दुष्काळ मदत: राज्यातील १ कोटी ५२ लाख शेतकऱ्यांना प्रत्येकी ५ हजारांची अंतरिम मदत; बँक खात्यात थेट निधी वर्ग होणार

राज्यातील दुष्काळग्रस्त शेतकऱ्यांना मोठा आर्थिक दिलासा देण्यासाठी राज्य मंत्रिमंडळाने १ कोटी ५२ लाख शेतकऱ्यांच्या बँक खात्यावर प्रत्येकी ५ हजार रुपयांची अंतरिम मदत जमा करण्यास मंजुरी दिली आहे. खरीप हंगामात पावसाचा प्रदीर्घ खंड आणि ऑक्टोबर हीटमुळे झालेल्या नुकसानीच्या पार्श्वभूमीवर हा महत्त्वपूर्ण निर्णय घेण्यात आला आहे. महसूल व कृषी विभागाने तयार केलेल्या दुष्काळ निकषांनुसार थेट लाभ हस्तांतरण (DBT) प्रणालीद्वारे ही रक्कम शेतकऱ्यांच्या खात्यात जमा होणार आहे. दिवाळीपूर्वी हा निधी मिळवून देण्याचा शासनाचा मानस असून यामुळे रब्बी हंगामाच्या पूर्वतयारीसाठी शेतकऱ्यांना त्वरित खेळते भांडवल उपलब्ध होणार आहे.