छत्रपती संभाजीनगर जिल्ह्यातील पैठण तालुक्यात प्रसिद्ध मोसंबी उत्पादक शेतकरी तीव्र संकटात सापडले आहेत. धरणातील पाण्याचा उपसा आणि भूजल पातळी खालावल्याने फळधारणेच्या काळात मोसंबी बागांना पाण्याचा मोठा ताण बसला आहे. ऑक्टोबरच्या उन्हामुळे झाडांची मोठ्या प्रमाणावर फळगळती होत असून उत्पादनात ४० ते ५० टक्क्यांची घट होण्याची भीती व्यक्त होत आहे. फळगळती रोखण्यासाठी सूक्ष्म अन्नद्रव्यांची आणि पोटॅशियमची फवारणी तातडीने करावी, असा सल्ला फलोत्पादन अधिकाऱ्यांनी दिला आहे.