छत्रपती संभाजीनगर जिल्ह्यातील वैजापूर येथे नांदूर मध्यमेश्वर डाव्या कालव्यातून हक्काचे शेतीचे आवर्तन तातडीने सोडण्याच्या मागणीसाठी हजारो संतप्त शेतकऱ्यांनी उपविभागीय अधिकारी कार्यालयावर भव्य धडक मोर्चा काढला. आधार शेतकरी जलदूत समितीच्या नेतृत्वाखाली पार पडलेल्या या आंदोलनात परिसरातील २५ गावांमधील शेतकरी मोठ्या संख्येने ट्रॅक्टर-बैलगाड्यांसह सहभागी झाले होते. रब्बी हंगामातील हरभरा, गहू आणि कांदा लागवडीसाठी पाण्याचे त्वरित नियोजन न झाल्यास नांदूर मध्यमेश्वर धरणावर तीव्र आमरण उपोषण आणि कालवा रोको आंदोलन छेडण्याचा इशारा शेतकरी नेत्यांनी प्रशासनाला दिलेल्या निवेदनात दिला आहे.